Daş nədir?

"Azercell"-in inşa yazısı müsabiqəsi elanına fikrimi mak.az-da bildirəndən sonra düşündüm: “Qəfil belə bir şey məndən soruşulsa nə deyərdim?” Ağlıma gəldi ki, nə isə yadıma sala bilərəm. Yadıma saldıqlarımı bir yerə toplamağa cəhd etdim: 

Daş – Azərbaycan dilinin izahlı lüğətinə görə, təbiətdə parçalar, yaxud böyük və kiçik kütlələr şəklində təsadüf olunan, suda həll olunmayan bərk cisim…

Daş – Gildən yaranan Adəmin qardaşı,

Daş – insanın ilk əmək aləti,

Daş – insana çörək vermək üçün aramsız fırlanan dəyirman daşı,

Daş - cəhənnəmdə  insanı yandıracaq yeganə yanacaq.

Daş – Düşdüyü yerdə ağır olan buralı, yerli,

Daş – gündə  5 dəfə milyonlarla insanın eyni vaxtda üz tutduğu “oralı” - Kəbə.

Daş - Bərklik, möhkəmlik,

Daş - damlanın inadı qarşısında zəiflik.

Daş – Dözümlülük,

Daş – insandan fərqli olaraq, Allaha ibadəti boynuna götürməyən dağların gücsüzlüyü.

Daş – “Bir daş altdan, bir daş üstdən” deyənin susmağı,

Daş – daş atıb, başını tutanın etirazı.

Daş – Birliyin nəyə qadir olduğuna nümunə,

Daş – təklik qorxusu.

Daş - Dava-dalaş,

Daş – “pəncərədən daş gəlir, ay bəri bax, bəri bax” oxuyan sevənin çağırışı.

Daş – Soyuqluq,

Daş - alov yaradan çaxmaq daşı.

Daş – Qiymətsiz qara daş,

Daş – Almaz.

Daş – “Bu dünyanın qara daşı göyərməz” deyənlərin ümidsizlik rəmzi,

Daş – üstünə zirehli tanklar gələn əliyalın fədainin ümid yeri

Daş – Möhkəm yol,

Daş – yazı,

Daş – musiqi,

Daş – memarlıq,

Daş – Qavaldaş, Qız qalası, Ayasofya məbədi, Misir ehramları, Tac Mahal, Azadlıq heykəli.

Daş – Tənə edilənənlərə daş-qalaq,

Daş – təriflənənlərə mərmər heykəl.

Daş – Zindan,

Daş – saray.

Daş – Fərhadın  Şirinə məhəbbətinin sübutu olan Bisütun,

Daş – “rədd olsun, dalınca qara daş” deyənin yaranan nifrəti.

Daş – Vicdanımız susanda ürəyimiz,

Daş – həqiqəti deyəndə istəməyənlərin başına düşdüyümüz.

Daş – Bir-birindən seçilməyəcək qədər çoxluq,

Daş – bir-birinə bənzəməyəcək qədər unikallıq.

Daş – Bütün bu sifətləri ilə bərabər təbiilik...

Sıranı artırmaq da olar... İlk yadıma düşənlər idi. Bir də yəqin ki, bunu romantikadan uzaqlaşmağa cəhd edən birinin yazdığını nəzərə alıb, səliqəsizliyi bağışlayarsınız.

Baxılıb: 11326